Hytaý üçin öndürilen üýtgeşik Redmi K80 Pro ýakyn wagtda täze at bilen dünýä bazaryna çykar. Ol Xiaomi Poco F7 Ultra adyny alar. Täze model esasy häsiýetnamasyny saklar, ýöne halkara ulanyjylary üçin ownuk üýtgeşmeler alar.
91mobiles Indonesia-nyň habar bermegine görä, Redmi K80 Pro-nyň programma üpjünçiliginde Poco F7 Ultra-nyň ady agzalýar we enjamyň 24122RKC7G model belgisi bolsa SDPPI Postel sertifikat maglumatlaryna laýyk gelýändigini tassyklaýar.
Poco F7 Ultra-nyň esasy tehniki häsiýetnamasynda, deslapky maglumatlara görä, Qualcomm-yň Snapdragon 8 Elite prosessorynyň bardygy aýdylýar. Smartfon optiki stabilizasiýaly (OIS) 50 megapiksel esasy kamera, 32 megapiksel ultra giň burçly modul we 2,5x optiki zumly 50 megapiksellik telefotokamera bilen üpjün ediler.
Şeýle hem enjamda piksel dykyzlygy 520 ppi-den ýokary bolan 2K tekiz ekran we 120W çalt zarýad bermegi goldaýan 6000 mAs kremniý-uglerod batareýasy bolar.
