2024-nji ýylda dünýäde milliarderleriň baýlygy rekord 2 trln dollar artdy we bu 2023-nji ýylyň depgininden üç esse ýokarydyr. Bu barada Oxfam haýyr-sahawat guramasynyň hasabatyna salgylanyp, The Guardian gazeti habar berýär.
Ylmy gözlege görä, milliarderleriň sany 204 adam artyp, 2 769-a ýetdi. Bu her hepdede dört sany täze milliarderiň peýda bolmagyna deňdir.
Olaryň umumy baýlygy 12 aýda 13 trln dollardan 15 trln dollara ýetdi – bu gözegçiligiň tutuş taryhynda ikinji iň uly ýyllyk ösüş.
Dünýäniň iň baý on adamy her gün ortaça 100 mln dollar gazandy. Eger olar bir gijede baýlygynyň 99%-ini ýitirse-de, olar milliarder bolup galar diýip, Oxfam hasabatynda aýdylýar.
Milliarderleriň baýlygynyň artýan döwründe garyplygyň çäginde ýaşaýan adamlaryň sany 3,6 mlrd derejesinde galýar we bu dünýä ilatynyň 44%-ine deňdir. Bu görkeziji 1990-njy ýyldan bäri üýtgemedi diýen ýaly. Her onunjy zenan maşgala garyplygyň soňky derejesinde ýaşaýar diýip, gurama belleýär.
Oxfam-yň hasaplamalaryna görä, dünýäde milliarderleriň baýlygynyň 36%-i miras alyndy, 18%-i bellibir ugurda monopoliýanyň, ýene 6%-i – aragatnaşyklaryň netijesinde gazanyldy.
1820-nji ýylda dünýäniň iň baý adamlarynyň 10%-iniň girdejisi iň garyp adamlaryň 50%-iniň girdejisinden 18 esse köpdi. 2020-nji ýylda ol eýýäm 38 esse boldy we tapawut ýokarlanmagyny dowam etdirýär.
