CES 2025 sergisinde Samsung kompaniýasy QD-OLED, Neo QLED, The Frame we The Frame Pro telewizorlarynyň täze hatarlaryny görkezip, “Samsung Vision AI” atly emeli aň esasly täze funksiýalar toplumy bilen tanyşdyrdy. Vision AI tomaşa edilýän film ýa-da serialdaky aktýorlar, ýerler, obýektler barada maglumat berer. Şeýle hem görmek üçin programmalary maslahat berer we tomaşa tejribesini has hem gowulandyrar diýip, SamMobile habar berýär.
Samsung Vision AI-y işläp düzmek üçin Microsoft (Copilot) we Google bilen hyzmatdaşlyk edendigini tassyklady. Şeýle-de Günorta Koreýanyň Maeil Kyungjae neşiriniň berýän maglumatlaryna görä, kompaniýa OpenAI bilen hem işleşýär. Bu hyzmatdaşlygyň çäginde, ulanyjylara öz gyzyklanmalaryna laýyk şahsy maslahatlar bermek, dürli soraglara jogap berýän we islendik tema boýunça söhbetdeşlik geçirmäge ukyply çat-botlary üpjün etmek, şeýle-de şol bir wagtda terjime funksiýasyny hödürlemek üçin GPT, DALL-E, Whisper we o1 ýaly ösen emeli aň tehnologiýalary ulanylar.
Meselem, Vision AI ulanyjynyň ozal gören filmlerine meňzeş triller žanryndaky filmleri maslahat berip biler, şeýle-de smartfon bolmazdan, filmiň mazmuny ýa-da aktýorlar baradaky soraglara jogap berip biler.
“Täze aýratynlyklar Samsung telewizorlarynda mazmuna tomaşa etmegi has gyzykly we amatly eder hem-de kompaniýanyň bazardaky öňdebaryjy ornuny has hem berkider” diýip, SamMobile ýazýar.
