Stol üstündäki tennis boýunça şwesiýaly oýunçylar Emil Olsson we Fredrik Nilsson täze dünýä rekordyny goýdular – olar arakesmesiz 13 sagat 37 minut 6 sekunt oýnap, Ginnesiň rekordlar kitabynda adyny ýazdyrdylar.
Tennisçiler öz toparlaryny “Spin Duo” diýip atlandyrýarlar. Oýnuň gidip duran wagty türgenler hemişe aýak üstünde durup, arakesmesiz söhbet edip, şol bir wagtda-da ünslerini oýna bermegi başardylar. Hatda olar oýun gidip durka ýeňil nahar hem iýdiler.
Emil we Fredrik, milli bolsun ýa dünýä bolsun täze rekord goýanlarynda, üstünliklerini uly şatlyk bilen belleýärdiler. Ahyrynda bolsa, olar britaniýaly oýunçylara degişli bolan ozalky dünýä rekordyny geçenlerinde, olara goltgy beren tomaşaçylaryň şowhunly sesleriniň astynda biri-birlerini gujakladylar.
Rekord goýlan duşuşyk 2024-nji ýylyň 20-nji iýulynda Şwesiýanyň Malmö şäherindäki bir barda geçirildi. Çäräniň wideosy YouTube-da noýabr aýynda peýda bolsada, olaryň rekordy resmi ýagdaýda Ginnesiň rekordlar kitabyna ýakynda girizildi.
