Analitik Mettýu Boll "Rockstar Games" kompaniýasynyň täze GTA VI oýnuna 100 dollar möçberinde baha kesip biljekdigini aýtdy. Bu beýleki wideo oýunlaryna hem täsir edip, olaryň bahalarynyň hem ýokarlanmagyna getirip biler diýip, KOTAKU portaly habar berýär.
Bolluň bellemegine görä, Rockstar Games, abraýyndan we giň gerimli diňleýjiler köpçüliginden peýdalanyp, has ýokary bahany kesgitläp biler.
“80-100 dollar aralygyndaky baha, beýleki oýun çykaryjylara Rockstar-yň mysalyna eýermäge ýol açjak signal bolar” diýip, hünärmen belleýär.
Ol uly göwrümli oýunlary döretmek üçin çykdajylaryň hem artýandygyny, emma olaryň alyjylar üçin bahasynyň köp ýyllaryň dowamynda üýtgemän galandygyny hem aýratyn nygtap geçdi.
Rockstar hakykatdanam rekord derejeli baha kesgitlärmi ýa-da kesgitlemezmi, häzirlikçe näbelli, ýöne bazarda ýokary kesgitlenen bahalaryň, alyjylary elden giderip biljekdigi baradaky aladalar dowam edýär.
