Microsoft kompaniýasy 2025-nji ýylyň 14-nji oktýabryndan başlap Windows 10 gurlan kompýuterlerde Microsoft Office programmalaryny goldamagy bes etjekdigini mälim etdi. Bu diýildigi, şol seneden soň ulanyjylaryň Word, Excel, Outlook, Microsoft 365, Microsoft Defender we OneDrive üçin täzelenmeleri almajakdygyny aňladýar diýip, The Verge takyklaýar.
Agzalan seneden soň, Office programmalary işlemegini dowam etdirer, ýöne wagtyň geçmegi bilen bu öndürijilikde we howpsuzlykda meseleleriň ýüze çykmagyna sebäp bolup biler, sebäbi kompaniýa gowşak goralan ýerler üçin düzedişleri goýbermez.
Microsoft Windows 10-nyň ulanyjylaryna doly goldawly Microsoft 365 programmalaryny ulanmagy dowam etdirmek üçin Windows 11-e geçmegi maslahat berýär. Kompaniýa 2025-nji ýyly "Windows 11-de PC-nyň täzeleniş ýyly" diýip atlandyryp, operasiýa ulgamyny täzelemegiň möhümdigini nygtaýar.
Mundan başga-da, 2025-nji ýylyň 14-nji oktýabrynda Windows 10-yň esasy goldawy hem tamamlanar. Windows 11-e geçip bilmeýän ýa-da geçmek islemeýän ulanyjylar Windows 10 üçin tölegli howpsuzlyk täzelenmelerini ýylyna 30 $-dan abuna ýazylyp alyp bilerler. Bu programma käbir ýurtlarda elýeterli bolmasa-da, 2028-nji ýyla çenli işlär.
Windows 10 häzirki wagtda kompýuterler üçin iň köp ulanylýan operasion ulgamy bolmagynda galýar, ony ulanyjylaryň takmynan 65% -i ulanýar. Windows 11 ulanyjylaryň 30%-i tarapyndan gurnaldy. Köp ulanyjy ýokary enjamlary talap edýändigi sebäpli Windows 11-i täzeläp bilmeýär. Ýakynda Microsoft Windows 11-i kompýuterlere TRM 2.0 modulsyz gurnamaga mümkinçilik bermek bilen, bu talaplaryny gowşatdy.
