Hytaýly alymlar Aýda atmosferanyň bütinleý ýok şertlerinde parlap biljek ilkinji baýdagy döretmäge girişdi. Täze taslama “Çane-7” missiýasyna taýýarlyk işleriniň bir bölegi boldy. Bu missiýa Ýeriň hemrasynyň günorta polýusynda suw buzuny gözlemegi maksat edinýär diýip, The Economic Times neşiri ýazýar.
“Biz Aýda wakuumyň bardygyny bilýäris, şonuň üçin baýdagy Ýerdäki ýaly parlatmak mümkin däl” – diýip, Uzak kosmosy öwrenmek barlaghanasynyň Ösen tehnologiýa institutynyň başlygynyň orunbasary Çžan Týançžu düşündirýär.
Alymyň aýtmagyna görä, baýdagyň parlamak meselesini çözmek üçin elektromagnit meýdany tehnologiýasy ulanylar. Ýagny, mata böleginiň üstünde ýapyk geçirijileri ýerleşdirip, olardan iki ugurly togy goýbermegiň netijesinde döreýän elektromagnit meýdany baýdagyň parlamagyna getirer.
“Çane-7-den” başga-da, Hytaý Halkara Aý gözleg stansiýasynyň taslamasynyň üstünde işjeň işleýär. Ony Aýyň günorta polýusynyň golaýynda gurmak isleýär. 2035-nji ýyla çenli toplumyň awtonom iş we adamyň gysga wagtlaýyn bolmagy üçin taýýar bolmagy meýilleşdirilýär.
“Biziň maksadymyz – 2035-nji ýyla çenli Aýyň üstünde we Aýa golaý orbitada durnukly we göwrümli ylmy-gözleg toplumyny döretmek” – diýip, Çžan belledi.
