2024-nji ýylda ähli tabşyrylan patent arzalarynyň tas ýarysy Hytaýyň paýyna düşdi. Ikinji orny eýelän ABŞ üç esse diýen ýaly yza galdy we öz arzalarynyň sanyny azaltdy diýip, WIPO halkara guramasynyň statistikasyna salgylanyp, South China Morning Post habar berýär.
Öňdebaryjylaryň bäşligini Ýaponiýa, Günorta Koreýa we Germaniýa jemleýär. Umuman, Aziýa ýurtlary geçen ýyl berlen ähli patentleriň 70%-den gowragyny emele getirdi. Bu gurşawda işjeňligi Hindistan, Finlýandiýa we Türkiýe hem görkezýär, olar iki belgili ösüş gazanyp, ilkinji ýigrimilige girdi.
Hytaýda 2024-nji ýylda 1,8 mln patent, ABŞ-da bolsa 603 194 patent berildi. HHR-de arzalaryň 93%-den gowragyny ýerli raýatlar, ABŞ-da bolsa ýarysyndan gowragyny daşary ýurtlular tabşyrdy.
Patent hasaba almak boýunça hem Hytaý uly tapawut bilen ABŞ-dan öňe geçýär. Geçen ýyl HHR-de 1 milliondan gowrak patent hasaba alyndy, ABŞ-da bolsa olaryň sany 319 815 birlik bilen çäklendi. Bir ýyl ozal bilen deňeşdirilende Hytaýda bu mukdar 124 000 patent, ABŞ-da 4570 patent köpeldi.
Umuman alanyňda, 2024-nji ýylda dünýäde, takmynan, 3,7 mln patent tabşyryldy, bu bolsa 2023-nji ýyldakydan tas 5% köpdür. Şol bir wagtyň özünde, takmynan, 2,1 mln patent hasaba alyndy.
Innowasion iş ugurlary boýunça kompýuter tehnologiýalary, elektrotehnika, ölçeg gurallary, sanly aragatnaşyk we lukmançylyk tehnologiýalary öňdebaryjydyr.
Şeýle-de, Hytaý söwda we dizaýn markalaryny hasaba almak boýunça global statistikada birinji orny eýeleýär, ol, degişlilikde, 7,3 mln we 825 müň arza bolup, bu ABŞ-dan tas dokuz esse köpdür. Dünýä bazarynda bu ugurda HHR-iň işjeňlik paýy geçen ýylyň jemi boýunça 50%-den geçdi.
