Adatça PDF faýllary tekstleri we suratlary saklamak üçin ulanylýar, ýöne olaryň ulanylyş gerimi ýönekeý bir resminamadan has giň bolup çykdy. Programmistler JavaScript goldawynyň kömegi bilen gönüden-göni PDF-de açylýan oýunlary döretdiler diýip, Tom’s Hardware habar berýär.
Howpsuzlyk boýunça analitik Tomas Rinsma adaty “Tetris” oýnuny PDF görnüşine salyp bildi. Ol oýnuň öz döreden wersiýasyny Pdftris diýip atlandyrdy. Ony gönüden-göni brauzerde oýnamak bolýar.
Rinsma brauzerlerde PDF gurallarynyň (PDFium we PDF.js) girizmek-çykarmak (I/O) mümkinçiligi bilen JavaScript-i goldaýandygyny, munuň hem şeýle ýönekeý oýny döretmäge mümkinçilik berendigini düşündirdi.
Rinsma “Tetrisi” iki guralda-da dogry işletmegiň kyn düşendigini aýtdy. Ol pikselleri döretmek üçin meýdanlary görkezmek we gizlemek usulyny ulandy we tekst meýdany arkaly klawiaturadan dolandyrmak mümkinçiligini goşdy.
Oýnuň kody “birneme tagaşyksyz” boldy, ýöne ol PDF skriptleriniň näderejede güýçli we çeýe bolup biljekdigini görkezýär. Pdftris-iň koduny görmek üçin PDF faýly ýükläp (bary-ýogy 60 KB), ony tekst redaktorynda açmak ýeterlik. Şeýle-de, GitHub-da teswirler bilen has düşnükli kod bar.
Ading2210 lakamly başga bir işläp düzüji DoomPDF-i döretdi, bu Doom oýnunyň brauzerde PDF arkaly işleýän wersiýasydyr. Bu oýun PDFium-y ulanýar we diňe Chromium brauzerlerinde işleýär. Şekil döretmek üçin ol tekst meýdanlaryny ulanyp, olary ASCII nyşanlary bilen doldurýar, bu hem 6 reňkli monohromy almaga mümkinçilik berýär.
Şekil täzelenmesi haýal (kadr üçin 80 millisekunt) bolup geçýär, ýöne oýun üçin bu ýeterlik. Şeýle-de, DoomPDF-de tekst konsoly bar. Oýnuň kody C-de ýazyldy we GitHub-da elýeterli.
