Bill Geýts Microsoft kompaniýasynyň bäsdeşlige ukyply mobil operasion ulgamyny döretmek babatda şowsuz synanyşyklarynyň kompaniýanyň 400 milliard dollar ýitirmegine ýol berendigini aýtdy. Ol Windows-yň iOS we Android bilen bäsleşip bilmeýändigine ökünýär. Telekeçi muny özüniň “iň uly şowsuzlygy” hasap edýär diýip, Gizmochina habar berýär.
Bill Geýts Google-yň Android operasion ulgamynyň ýaňy meşhur bolup başlan döwründe Microsoft-y dogry dolandyrmandygyny boýun aldy. Windows Phone operasion ulgamy 2010-njy ýyllarda bazara çykdy, emma bu gaty giç boldy. Şeýle-de ulgamy ösdürmek üçin ýeterlik derejede tagalla edilmedi. Şol sebäpden hem mobil bazarda diňe iOS bilen Android öňe saýlandy.
Geýts bu ýagdaýy “özüniň iň uly şowsuzlygy” diýip atlandyrdy. Onuň pikirine görä, Microsoft iOS-yň esasy bäsdeşi bolup bilerdi, hatda onuň ornuna-da geçip bilerdi. Emma bu ýalňyşlyk kompaniýanyň 400 milliard dollar ýitirmegine sebäp boldy.
Windows Phone operasion ulgamy bary-ýogy 10 ýyl hereket etdi. Ulanyjylaryň gyzyklanmasynyň azalmagy netijesinde, 2017-nji ýylda ol doly bes edildi. 2020-nji ýylda bolsa resmi taýdan ýapyldy. Şol ýyl Bill Geýts Microsoft-y doly taşlap, haýyr-sahawat işlerine üns berdi.
Şeýle-de bolsa, Microsoft kompýuter operasion ulgamlarynda üstünlik gazanmagyny dowam etdirýär. Windows 2024-nji ýylda 72% bazar paýy bilen dünýäde iň giňden ulanylýan ulgamlaryň biri bolup galýar. Häzirki wagtda Microsoft-yň umumy bahasy 3 trillion dollara barabardyr.
