OpenAI kompaniýasy ChatGPT üçin “Tasks” (“Ýumuşlar”) ady bilen täze funksiýany hödürledi. Ol eýýäm beta-wersiýada elýeterli bolup, ýatlatmalary döretmäge we meýilleşdirilen hereketleri dolandyrmaga mümkinçilik berýär.
Hyzmat Google Assistent ýa-da Siri kömekçileriniň mümkinçilikleri bilen meňzeş funksiýalary isleýän ulanyjylara gönükdirilendir diýip, 3DNews belleýär.
Funksiýa ýumuş tabşyrmaga mümkinçilik berip, nämäni we haçan etmelidigini anyklaşdyrýar. Mysal üçin, her gün howa çaklamasynyň iberilmegini, möhüm seneleriň ýatladylmagyny ýa-da çagalar üçin ertekileriň taýýarlanmagyny sazlap bolar. Tasks-y işjeňleşdirmek üçin, ulanyjylar “4o with scheduled tasks” modelini saýlap, zerur parametleri kesgitlemeli.
Ýumuşlary hem çatda, hem täze Tasks bölümçesinde dolandyryp bolýar. Ulanyjylar ähli gurluşlarda habarnama alar. Bir wagtyň özünde 10-a golaý ýumşy meýilleşdirmek bolýar.
Tasks funksiýasy Plus, Team we Pro nyrhnamalaryny ulanyjylar üçin elýeterlidir. OpenAI häzirlikçe bu funksiýanyň mugt ulanylyş üçin elýeterli boljakdygyny ýa-da ýokdugyny anyklaşdyrmaýar. Ähtimal, ol aýda $20 - $200 bahaly premium meýilnamalarynyň bir bölegi bolup galar.
