Tokioda doglan, dünýäniň iň baý aşpezi hasaplanýan Alan Wongyň baýlygy 880 million funt sterlinge ýetýär. Bu, meşhur iňlis aşpezleri Jeými Oliwer (164 million funt sterling) bilen Gordon Ramziniň (180 million funt sterling) jemi baýlygyndan hem iki esse köpdür diýip, britan neşiri Daily Mail habar berýär.
Wong ilki Gawaý tagamlary bilen tanalyp, 2009-njy ýylda ABŞ-nyň prezidenti Barak Obama üçin nahar bişirmegi bilen has hem meşhurlyk gazandy. Wong öz işini birnäçe restoran açmak bilen giňeltdi we milli Gawaý tagamlaryny dünýä tanatmagy başardy.
Dünýäniň iň baý ikinji aşpezi – Tesla kompaniýasynyň esaslandyryjysy, milliarder Ilon Maskyň kiçi erkek dogany Kimbal Maskdyr. Kimbal Mask, “The Kitchen Restaurant Group” restoranlar ýygyndysynyň eýesi bolup, ABŞ-nyň dürli şäherlerindäki restoranlary bilen tanalýar.
Dünýäniň iň baý üçünji aşpezi – Jeými Oliwer, 1990-njy ýyllardaky “The Naked Chef” telewideniýe programmasy bilen meşhur bolup, kitaplary we restoranlary arkaly uly şowhun gazanmagy başardy.
Dünýäniň iň baý dördünji aşpezi – Gordon Ramzi, futbol karýerasyny 1985-nji ýylda şikes sebäpli taşlap, aşpezlige başlady. Ol, 17 sany Mişlen ýyldyzynyň eýesi bolup, dünýäniň dürli künjeklerinde restoranlar açdy. Ramzi, “Hell’s Kitchen” ýaly meşhur telewideniýe programmalary bilen tanalyp, tagam taýýarlamakdaky ýokary hünärini köpçülige görkezmegi başardy.
