2025-nji ýylda Apple akylly sagatlarynyň tutuş hatarynyň, şol sanda Apple Watch SE, Series 11 we Ultra 3 modelleriniň düýpli täzelenmesini meýilleşdirýär diýip, 9to5Mac habar berýär.
Apple Watch-yň has gymmatly modelleriniň daşky görnüşiniň, ähtimal, üýtgemejekdigine garamazdan, Apple Watch Ultra 3 hemra aragatnaşygynyň we 5G RedCap ulgamynyň goldawyna eýe bolar. Bu hem birikmek mümkinçiligini ep-esli giňelder.
Şeýle-de, kompaniýa Apple Watch Series 11 we Ultra 3 sagatlaryna gan basyşyny ölçemek funksiýasyny goşar. Ýöne, Bloomberg-den Mark Gurmanyň maglumatlaryna görä, bu funksiýanyň öz nýuanslary bar. Ol “ýokary basyş detektory” hökmünde işläp, ulanyjyny bolup biljek mesele barada duýdurar.
Funksiýa “ulanyjylara diastolik we sistolik derejeli takyk görkezmeleri bermeýär, ýöne ýokary gan basyşynyň bardygyny habar berýär” diýip, Gurman belledi.
Ilkibaşda arterial basyşa gözegçilik funksiýasy Apple Watch Series 10-da peýda bolar diýlip meýilleşdirilipdi, ýöne onuň çykmagy sagatlaryň gurluş aýratynlygy sebäpli soňa goýuldy. Muňa garamazdan, kompaniýa bu funksiýany 2025-nji ýylda hödürlemegi meýilleşdirýär.
Eger gürrüňler tassyklansa, bu 2022-nji ýyldan bäri tutuş Apple Watch hatarynyň ilkinji göwrümli täzelenmesi bolar. Şol wagt Apple Watch SE 2, Series 8 we ilkinji Ultra modeli çykarylypdy. Geçen ýyl kompaniýa täze SE we Ultra 3 sagatlaryny hödürlär diýlip garaşyldy, ýöne kompaniýa gara titan korpusda täze Ultra 2-ni çykarmak bilen çäklendi.
Mundan başga-da, Apple beýleki gurluşlarda-da akylly funksiýalary ulanmagy meýilleşdirýär. Mysal üçin, ýürek ritmine gözegçilik funksiýasy we beýleki peýdaly funksiýalar bilen täze AirPods-yň çykmagyna garaşylýar.
