Öňümizdäki hepde, 22-nji ýanwarda geçiriljek “Samsung Galaxy Unpacked” çäresiniň öň ýanynda, Galaxy S25 seriýasy bilen bagly möhüm maglumatlar ýaýrady. Syzdyrylan maglumatlara görä, täze nesil smartfonlaryň bahalary 2024-nji ýylky modellere garanyňda, ortaça 40 dollar ýokary bolar.
Bahalaryň ýokarlanmagy bolsa täze Snapdragon 8 Elite prosessorlarynyň ulanylmagy bilen baglanyşdyrylýar. Bu prosessor häzirki wagtda iň gymmat we iň güýçli mobil prosessorlaryň biri hasaplanýar.
Täze telefonlaryň takyk bahalary Wýetnam bazary üçin şeýle beýan edilýär:
- Galaxy S25 (256 GB): 23 990 000 dong (takmynan 945 dollar);
- Galaxy S25 (512 GB): 27 490 000 dong (takmynan 1083 dollar);
- Galaxy S25 Plus (256 GB): 27 990 000 dong (takmynan 1103 dollar);
- Galaxy S25 Plus (512 GB): 31 450 000 dong (takmynan 1239 dollar);
- Galaxy S25 Ultra (256 GB): 34 990 000 dong (takmynan 1378 dollar);
- Galaxy S25 Ultra (512 GB): 38 490 000 dong (takmynan 1516 dollar);
- Galaxy S25 Ultra (1 TB): 45 790 000 dong (takmynan 1804 dollar).
Şeýle hem meşhur insaýder Ewan Bless Samsung Galaxy S25 seriýasyna degişli tanyşdyryş suratlaryny köpçülige ýetirdi. Suratlarda Galaxy S25, Galaxy S25+ we Galaxy S25 Ultra modelleriniň daşky keşbi aýdyň görkezilýär. Bu suratlarda telefonlaryň inçe çarçuwaly ekranlaryny, kamera bloklarynyň ýerleşiş tertibini, S Pen stilusynyň (elektron galamynyň) gurluşyny we täze tanyşdyrylan “Galaxy AI” atly emeli aň ulgamyny görmek bolýar.
Täze maglumatlara görä, stilusyň Bluetooth moduly aýrylar. Şeýle-de suratlardan, Galaxy S25+ modeliniň dizaýn taýdan öňki Galaxy S24+ modeline meňzeşdigini, Ultra modelinde bolsa özboluşly dizaýn aýratynlyklarynyň aradan aýrylandygyny görmek bolýar.
