Samsung kompaniýasy ulanylan Galaxy smartfonlaryny yzyna satyn alyp başlady. “Galaxy Easy Compensation” atly bu programma Günorta Koreýada şu gün işe giriziler we ýakyn wagtda beýleki ýurtlarda hem elýeterli bolar diýip, Neowin neşiri habar berýär.
Programmanyň esasy maksady elektron galyndylaryň azaldylmagy we olaryň gaýtadan işlenmegidir.
“Biz bu programmanyň Galaxy önümleriniň uzak möhletleýin gymmatlygyny ýokarlandyrmagyna we aýlawly ykdysadyýetiň ösüşine goşant goşmagyna garaşýarys” diýip, Samsung kompaniýasynyň wekili Çon Ho-jin aýtdy.
Indi köne Galaxy telefonlarynyň eýeleri täze telefon satyn almagy meýilleşdirmeseler-de, öz enjamlaryny aňsatlyk bilen satyp bilerler. Kabul edilýän modelleriň sanawyna Galaxy S23, S22, S21, S20, Z Fold5, Z Fold4, Z Fold3, Z Flip5, Z Flip4 we Z Flip3 girýär. Kabul edilýän modelleriň sanawy ýurda baglylykda üýtgäp biler.
Enjamy satmak üçin Samsung.com sahypasyna girip, “Galaxy Easy Compensation” bölüminde onuň bahasyny kesgitläp, görkezmelere laýyklykda smartfony kurýer gullugy arkaly ibermeli bolar. Samsung enjamyň ýagdaýyna görä (“Ajaýyp”, “Gowy” ýa-da "Gaýtadan işlemeli"), bahany hödürlär.
