Sony korporasiýasy CES 2025 sergisinde oýun dünýäsine doly aralaşmaga mümkinçilik berýän täze Future Immersive Entertainment Concept (FIEC) tehnologiýasyny tanyşdyrdy. Bu tehnologiýa oýunçylara diňe görmek we eşitmek bilen çäklenmän, eýsem oýunlardaky obýektleriň, iýmitleriň, howanyň hem partlamalaryň ysyny almaga, şeýle-de olary ellemäge we duýmaga mümkinçilik berýär.
FIEC – bu oýun otagy bolup, onuň diwarlary Sony Crystal atly LED paneller bilen örtülendir. Gurluşa goşulan ses, titreme we ys çykaryjy ulgamlar oýunçylara özlerini oýnuň içinde ýaly duýmaga mümkinçilik berýär.
Tehnologiýanyň tanyşdyrylyş wagty, myhmanlara ony The Last of Us atly oýun arkaly synap görmäge mümkinçilik berildi. Oýunçylar ekranlarda görünýän hakykata ýakyn gurşaw bilen bir hatarda, tüssäniň we ösümlikleriň yslaryny duýup, hatda ýaraglary simulýasiýa etmegi hem başardylar.
Bilermenler bu tehnologiýanyň aşa çylşyrymlydygy we gymmat bahalydygy sebäpli, onuň häzirlikçe diňe konsept derejesinde galjakdygy barada aýdýarlar. Şeýle-de bolsa, Sony beýleki meşhur franşizalarda, mysal üçin, God of War we Horizon ýaly oýunlarda bu tehnologiýanyň mümkinçiliklerini görkezmek üçin taslamanyň üstünde işlemäge dowam etjekdikleri barada belläp geçdi.
