Super agyr agramda öňki dünýä çempiony britaniýaly Taýson Fýuri professional karýerasyny tamamlaýandygyny mälim etdi. Ol muny karýerasynda eýýäm üçünji gezek edýär.
“Hemmäňize salam. Gysgaça aýdaýyn: men boksda karýeramy tamamlaýandygymy habar berýärin. Bu gyzgalaňly boldy we men her minutdan lezzet aldym. Ýöne men şunuň bilen jemlemek isleýärin” – diýip, türgen Instagram sahypasynda ýazdy.
Mundan öň Fýuri 2016-njy we 2022-nji ýylda boksdan el üzdi – birinji gezek öňki dünýä çempiony Wladimir Kliçkodan üstün çykandan soň (emin agzalarynyň biragyzdan karary bilen) we gadagan edilen maddalary ulanmagy bilen bagly dawadan soň, ikinji gezek – angliýaly Dillian Uaýty ýeňenden soň. Soňky gezek ol öz çözgüdini Deonteý Uaýlder bilen trilogiýada ýeňiş gazanandan soň güýçli garşydaşynyň galmandygy bilen delillendirdi.
Fýuri karýerasynda soňky iki söweşini ukrainaly Aleksandr Usike garşy geçirdi. 2024-nji ýylyň maý aýynda bolan birinji söweşde emin agzalarynyň tapawutly karary bilen ýeňildi, soňra şol ýylyň dekabr aýynda eýýäm biragyzdan ses berilmegi bilen ýeňildi.
36 ýaşly Fýuri professional ringde 37 söweşe gatnaşyp, 34 ýeňiş gazandy, iki gezek ýeňildi, bir söweş deňme-deň tamamlandy. Ol WBC (2020 – 2024), IBF (2015), WBA (Super) (2015-2016), WBO (2015 – 2016), IBO (2015 – 2016) we The Ring žurnaly (2015-2018; 2020-2022) boýunça öňki dünýä çempionydyr.
