Şu gün 2024 G3 (ATLAS) atly kometa Güne iň ýakyn uzaklykdan geçer. Ol perigeliý nokadyna ýeter we Günden bary-ýogy 14 million kilometr uzaklykda geçer. Şol bir wagtda ol kometa Ýerden 140 million kilometr uzaklykda bolar diýip, Space.com ýazýar.
Eger bu kometa Güne golaýlanda dargamasa, ony Ýerden hem görüp bolar diýip, alymlar çaklaýarlar.
Bu kometa, buzly asman jisimlerinden ybarat, Günden 16 trillion kilometr uzaklykda ýerleşýän Oort buludyndan geldi. Hasaplamalar onuň ýapyk orbita eýedigini we Günüň daşyndan 160 müň ýyldan bir gezek aýlanýandygyny görkezýär. Bu kometanyň ozal hem Gün ulgamynyň içinden geçendigi çaklanylýar.
Astronomlar onuň Ýupiter ýa-da Wenera ýaly ýagtylykda bolup biljekdigini belleýärler. Bu kometany görmek örän kyn. Güne golaýdygy sebäpli, diňe daňdan ýa-da gün ýaşanda, diňe belli ýarym şarlardan görlüp bilner.
Alymlar kometanyň häzirki ýagdaýy boýunça aladalanýarlar. Sebäbi, içki gurluşynyň dargap başlandygyny görkezýän alamatlar bar. 2-nji ýanwarda kometada, ähtimal, şol dargama bilen baglanyşykly partlama bellige alyndy. Şeýle-de bolsa, bu jisim häzirki wagtda ýagtylygyny we bitinligini saklaýar.
Bu kometa 2024-nji ýylyň aprelinde ATLAS ulgamy arkaly, Ýerden 655 million kilometr uzaklykda tapyldy. Şeýle wakalar örän seýrek duş gelýär.
