Gonkong Hytaý uniwersitetiniň (CUHK) alymlary, plastik materiallaryň ornuny tutujy hökmünde, kombuçadan – ýagny çaý kömeleginden ýasalan içgiden, tebigatda ýitip gidýän polimeri öndürdiler. South China Morning Post habar gullugynyň berýän maglumatlaryna görä, bu täze material ekologiki taýdan arassa bolup, azyk önümlerinde we içgilerde ulanylýan plastik gaplamalaryň ornuna geçip biler.
Gonkong Hytaý uniwersitetiniň himiýa bölüminde işleýän topar bu polimeri döretmek üçin kombuçadan peýdalandylar. Sebäbi kombuça çaý bilen şekeriň bakteriýa we hamyrmaýa arkaly fermentlenmegi (glýukozanyň mikroorganizmler tarapyndan iýilip, organiki maddalara öwrülmegi) bilen ýasalýar. Bu bolsa täze materialyň açyk tebigatda, toprakda 3-5 aýyň dowamynda doly ýitip gitmegine ýol berýär.
“Biz bu täze materialy suwa we ýaglara çydamly edip bilýäris” diýip, Gonkong Hytaý uniwersitetiniň dekanynyň kömekçisi Ngai To belläp geçdi. “Ulanan zatlarymyzyň bahasy örän gymmat däl, sebäbi esasan çaý ýapraklary bilen şekerden peýdalandyk” diýip belledi.
Alymlar Hytaýda plastik materiallaryň ulanylyşyna girizilen çäklendirmeleriň, bu täze material üçin uly mümkinçilikleriň öňüni açýandygyny belleýärler.
