BYD kompaniýasy täze wideosynda sürüjisiz Yangwang U9 superkarynyň 120 km/sag tizlik bilen dürli päsgelçiliklerden böküp geçişini görkezdi.
Ilkinji päsgelçilik ini 2,5 metr bolan suwly çukur bolup, awtomobil işjeň DiSus-X asgyjynyň (podweska) kömegi bilen onuň üstünden böküp geçýär. Kompaniýanyň maglumatlaryna görä, böküşiň uzynlygy 6 metrden gowrakdyr. Bu päsgelçilikden soň awtomobil beýikligi 3,5 sm töweregi bolan ýol tikenlerinden böküp geçýär.
CarNewsChina neşiriniň belleýşi ýaly, Yangwang U9 superkary BYD-yň premium brendiniň eýýäm ikinji awtomobilidir. Ol kuwwaty 960 kWt bolan dört elektrik hereketlendirijisi hem-de her tigiriň amortizatorlaryny sazlap bilýän DiSus-X pnewmatik asgyjy bilen üpjün edildi. Ol awtomobile bökmäge ýa-da “tans etmäge” mümkinçilik berýär.
Şeýle-de, pnewmatik ulgam duýdansyz öwrümlerde korpusy durnukly ýagdaýda saklamaga kömek edýär. Zerur bolan ýagdaýynda ol awtomobile hereketini 3 tigirde dowam etdirmäge hem mümkinçilik berip biler.
Superkar 2,36 sekuntda tizligini 100 km/sag çenli artdyrýar we 9,78 sekuntda 400 metr aralygy geçip bilýär. 2024-nji ýylyň noýabr aýynda U9 Nýurburgring ýolunda 7:17,9 netijäni görkezdi, bu bolsa elektromobiller üçin ýokary öndürijiligi aňladýar.
Yangwang U9 2024-nji ýylyň fewral aýynda 1,68 mln ýuan (takmynan, $230 000) baha bilen hödürlendi.
