Ýaponiýanyň ispace startapy ikinji Aý missiýasyna taýýarlanýar. Resilience gonuş modulynyň uçurylmagy 2025-nji ýylyň 15-nji ýanwaryna meýilleşdirilýär. Kompaniýa 2023-nji ýylyň aprel aýynda şowsuz gonuş bilen tamamlanan ilkinji synanyşykdaky ýalňyşlyklary göz öňünde tutandygyny belleýär.
SpaceWatch-yň belleýşi ýaly, eger geçenki synanyşyk üstünlikli bolan bolsa, bu ispace startapyny Aýyň üstüne ýeten ilkinji hususy kompaniýa ederdi. Ahyrynda bu üstünlik Intuitive Machines amerikan kompaniýasyna degişli boldy. Onuň kosmos enjamy gonuş burçunyň nädogry bolandygyna garamazdan, synag geçirip, Ýere suratlary ibermegi başardy.
ispace-iň täze missiýasy Hakuto-R Mission 2 15-nji ýanwarda Floridadaky Kennedi kosmos merkezinden uçar. Ol Firefly Aerospace amerikan kompaniýasy tarapyndan döredilen başga bir Aý moduly bilen bilelikde uçurylar, bu hem ýaponlara çykdajylary azaltmaga mümkinçilik berer.
Firefly-dan Blue Ghost gonuş moduly uçuşdan 45 günden soň Aýa ýeter. ispace-den Resilience-iň gonuşy maý aýynyň ahyryna ýa-da iýun aýyna meýilleşdirilýär.
Üstünlikli gonan ýagdaýynda, Resilience Ýeriň hemrasyna mikroroweri we bäş sany peýdaly ýüki düşürer. Aýratynam, missiýanyň çäklerinde kosmos enjamlarynda ýangyç hökmünde ulanmak üçin suwy kisloroda we wodoroda bölmek boýunça tejribäni geçirmek meýilleşdirilýär.
