Neuralink kompaniýasynyň Blindsight atly beýni implanty üçünji adama üstünlikli ornaşdyryldy. Bu barada amerikan telekeçisi we milliarder Ilon Maskyň hut özi köpçülige mälim etdi. Mask 2025-nji ýylda bu neýroçipi ýene 20-30 adama ornaşdyrmagy meýilleşdirýändiklerini aýtdy diýip, life.ru habar berýär.
"Şu wagt Neuralink implantlary bilen ýaşaýan üç adam bar we olaryň hemmesi gowy işleýär… Şu ýylyň dowamynda gözegçilik edilýän, Neuralink implanty bolan täze 20-30 hassanyň bolmagyna garaşýarys" diýip, Ilon Mask Stagwell marketing kompaniýasynyň müdiri Mark Penn bilen geçirilen söhbetdeşliginde aýdyp geçdi. Bu söhbetdeşlik X sosial ulgamynda neşir edildi.
Mundan öň hem Mask, bu beýni implantlarynyň geljekde adamlaryň durmuşynyň möhüm bir bölegi boljakdygy barada aýdypdy.
Ýatlatsak, 2024-nji ýylyň ýanwar aýynda Ilon Mask ilkinji gezek adam beýnisine çipiň üstünlikli ornaşdyrylandygyny habar beripdi. Onuň aýtmagyna görä, Neuralink implanty adamlara elektron enjamlary ellerini ulanmazdan, diňe “pikiriň” üsti bilen dolandyrmaga mümkinçilik berer. Bu tehnologiýa, esasan hem synalaryndan mahrum bolan adamlar, maýyplar üçin peýdaly bolar. Mask neýroçip ýerleşdirilen adamyň diňe pikiriniň üsti bilen kompýuter syçanjygyny dogry hereketlendirmegi başarandygyny hem belläp geçdi.
