“Barselona” ýarymgoragçysy Dani Olmony we hüjümçisi Pau Wiktory hasaba almak üçin wagtlaýyn ygtyýarnama aldy. Olar indi möwsümiň galan böleginde klub üçin çykyş edip bilerler. Patyşalyk ispan futbol federasiýasy (RFEF) bilen La Liga futbolçylary hasaba almakdan ýüz öwrenden soň, katalon kluby şikaýat arzasy bilen Ispaniýanyň Ýokary sport geňeşine (CSD) ýüz tutdy, ol hem arzany kanagatlandyrdy diýip, AS habar berýär.
Işe garamaklyk ýene birnäçe aý dowam edip biler, CSD “klub hem oýunçylar üçin düýpli ykdysady we sport ýitgisine” ýol bermezlik maksady bilen futbolçylaryň wagtlaýyn hasaba alynmagyna rugsat berdi.
Hasaba almak bilen bagly kynçylyklar maliýe fair play düzgünleri sebäpli ýüze çykdy. “Barselona” Olmony 2024-nji ýylyň tomsunda “Leýpsigden” 55 mln ýewro satyn aldy, ýöne zähmet haklarynyň soňky derejesini ýerine ýetirmekde kynçylyklar ýüze çykdy. Oýunçylary satmak we käbir futbolçylaryň şikes almagy bilen meseläniň wagtlaýyn çözgüdi tapyldy. Ýöne 31-nji dekabrda wagtlaýyn hasaba alyş möhleti tamamlandy we klub ýene-de kynçylyklara sezewar boldy.
RFEF “Barselonanyň” Nike bilen täze şertnamasyny göz öňünde tutmakdan ýüz öwürdi. Kluba “Kamp Nou” stadionynda VIP orunlaryň satuwy maliýe serişdelerini tapmaga kömek etdi, ýöne hasaba almak meseleleri futbolça bir möwsümiň çäginde bir klub bilen iki dürli hasaba alyş ygtyýarnamasy bilen baglanyşmagy gadagan edýän RFEF-iň düzgünleri sebäpli çözülmän galdy.
Olmo we Wiktor Ispaniýanyň Superkubogy ugrunda ýaryşda Bilbaonyň “Atletigi” bilen ýarym finalda oýnamadylar. Munuň sebäbi CSD-niň çözgüdi oýun üçin sanaw berlenden soň belli boldy (duşuşyk “Barselonanyň” 2:0 hasabynda utmagy bilen tamamlandy). Ýöne finala futbolçylaryň ikisi-de gatnaşar. Toparyň garşydaşy 10-njy ýanwara geçilýän gije ýarym final oýnunda duşuşjak “Real” ýa-da “Malýorka” bolar.
