Samsung kompaniýasy indiki Unpacked çäresiniň geçiriljek senesini tassyklady. Ol 22-nji ýanwarda – Las-Wegasdaky CES sergisinden iki hepde soň San-Hosede geçiriler.
Geljekki çärede günorta koreýaly tehnologiýa ägirdi täzelenen Galaxy AI emeli aň ulgamy bilen täze Galaxy S25 smartfonlaryny hödürlemegi meýilleşdirýär. Täze smartfon hataryna azyndan üç model: Galaxy S25, Galaxy S25+ we Galaxy S25 Ultra girer. OS hökmünde Android 15 çykyş eder. Gajetleriň 7 ýyllyk täzelenme goldawyny almagyna garaşylýar.
Smartfonlar Qualcomm Snapdragon 8 Elite prosessory bilen enjamlaşdyrylyp, 200 MP esasy sensor bilen bilelikde iki sany 50 MP uly burçly we telefoto linzalary utgaşdyrýan kamera ulgamyna eýe bolar.
Şeýle-de, tanyşdyrylyş çäresinde kompaniýanyň Galaxy S25 Slim smartfonyny hödürlemegine garaşylýar. Gürrüňlere görä, ol Galaxy S hatarynyň iň inçe smartfony bolar. Muny gazanmak üçin bolsa modeliň simsiz zarýad beriş mümkinçiliginden mahrum bolup biljekdigi habar berilýär.
Eýýäm häzir ulanyjylar geljekki smartfonlary öňünden mugt bron edip bilýär. Muny 22-nji ýanwara çenli eden müşderilere töleg wagty gelende 50 dollar möçberde arzanladyş hödürlenýär. Şeýle-de, bron edýänler 5000 dollarlyk Samsung sowgat kartyny utmak mümkinçiligini gazanar.
Mundan başga-da, Samsung müşderilere köne telefonlaryň çalşygy üçin 1250 dollara çenli arzanladyş hödürlemäge taýýar. Mukdar gurluşyň modeline bagly bolar. Şeýle-de, öň hödürlenen maglumatlara görä, deslapky sargydy resmileşdiren ulanyjylar Google-dan Gemini Advanced platformasyna bir ýyl mugt girmek mümkinçiligini gazanyp biler.
Galaxy Unpacked 2025 tanyşdyrylyş çäresi Samsung Newsroom, Samsung.com arkaly göni ýaýlymda ýa-da kompaniýanyň resmi YouTube kanalynda görkeziler.
