Amerikaly we singapurly alymlar haýsy ýurtlaryň ilatyň garramagyna has gowy uýgunlaşýandygyna baha berdiler. Gözleg 143 ýurdy öz içine alyp, demografiki üýtgemelere taýýarlyk derejesinde düýpli tapawutlary ýüze çykardy. Iň gowy görkezijiler Şweýsariýa degişli boldy diýlip, Nature Aging žurnalynda neşir edilen ylmy işde aýdylýar.
Bahalandyrma bäş esasy ugry: öndürijiligi we gatnaşygy, abadançylygy, deňligi, jebisligi we howpsuzlygy göz öňünde tutýan Global Aging Society Index indeksiniň ulanylmagy bilen geçirildi. Iň ýokary indeks derejesi 100 bal.
Öňdebaryjylaryň onlugyna, esasan, Demirgazyk Ýewropa ýurtlary girdi: Şweýsariýa, Norwegiýa, Daniýa, Şwesiýa, Islandiýa, Täze Zelandiýa, Finlýandiýa, Niderlandlar, Kanada we Singapur.
Soňky orunlarda, esasan, Afrika döwletleri ýerleşdi: Ruanda, Togo, Owganystan, Benin, Malawi, Gabon, Kongo, Eswatini, Zambiýa we Botswana.
Ortaça global görkezijiler öndürijilikde 46,8 baldan jebislik kategoriýasynda 60,6 bala çenli aralykda üýtgedi. Hünärmenler netijeler bilen ýurduň JIÖ-niň arasynda baglanyşygyň bardygyny belleýär. Ýöne gözlegiň kross-seksion häsiýetlidigini, şeýle-de maglumatlaryň ýoýulmagy bilen bagly çäklendirmeleriň bardygyny bellemek gerek.
BMG-niň maglumatlaryna görä, 2050-nji ýyla çenli 65 ýaşdan uly adamlaryň sany iki esse artyp, 1,5 milliarda ýetip biler. Bu döwletlerden üýtgeşmelere uýgunlaşmak üçin uly tagallalary talap edýär.
