2025-nji ýylyň 5-nji ýanwaryna çenli ýagdaýa görä, Mr.Beast ady bilen tanalýan bloger Jimmi Donaldson öz YouTube kanalyna ýazylan adamlaryň sanyny 341 million 671 müňe ýetirmegi başardy. Bu Ilat ýazuwy býurosynyň maglumatlaryna görä, 341 million 156 müň adam bolan ABŞ-nyň ilat sanyndan hem köpdür diýip, Esquire.kz habar berýär.
Mr.Beast-iň kanaly 2012-nji ýylyň 20-nji fewralynda döredildi. Şondan bäri onda umumy tomaşa sany 69 milliarddan geçdi. Häzire çenli Jimmi uly göwrümli taslamalary we uly haýyr-yhsanlary öz içine alýan kontentleri döretmäge bolan çemeleşmesiniň kömegi bilen dünýäde iň abraýly blogerleriň birine öwrüldi.
Ýakynda Donaldson täze taslamasy diýip atlandyran tutuş bir şäheriň gurluşygynyň tamamlanandygyny habar berdi. Blogeriň aýtmagyna görä, ol bu pikiri durmuşa geçirmek üçin 14 million dollar sarp etdi.
