SpaceX kompaniýasy Super Heavy-niň birinji basgançagy bilen birlikde Starship raketasynyň ýedinji synag uçuşyna taýýarlanýar. Uçuryş 10-njy ýanwara meýilleşdirilýär. Synag täze inženerçilik çözgütlerini synamaga gönükdiriler diýip, SpaceNews ýazýar.
Eger uçuryş bellenilen güni amala aşyrylmasa, onda 11-nji ýanwardan başga, tä 16-njy ýanwara çenli bir gün yza süýşüriler.
Bu gezek esasy üns kosmos gämisiniň täzelenen ulgamlaryny synagdan geçirmäge hem-de gäminiň gurluşy we birinji basgançagy bilen baglanyşykly takyk inženerçilik çözgütlerini synagdan geçirmäge gönükdiriler. Üýtgeşmeleriň arasynda öň rullaryň gyzyşyny peseltmek üçin onuň täzeden işlenip gurluşy, 25% ulaldylan ýangyç baky, şeýle hem täze awionika - kämilleşdirilen bort kompýuterleri, aragatnaşyk we elektrik paýlaýyş ulgamlary bar.
Ýylylyk goragyna aýratyn üns berler: suw bilen sowadylýan plitkalary goşmak bilen, dürli örtükler synag ediler. Käbir plitkalar korpusyň gowşak ýerlerini barlamak üçin ýöriteläp aýrylar.
Starship ilkinji gezek Starlink V3-i simulýasiýa edýän on sany emeli hemrany alyp gitmäge synanyşar. Olar bölünip aýrylanlaryndan soň orbitadan düşerler. Gäminiň özüni, öňküsi ýaly, Hindi ummanyna düşürmek meýilleşdirilýär.
Super Heavy-niň basgançagyny ýene-de kompaniýada “nahar iýilýän çöpler” diýip atlandyrylýan äpet Mechazilla metal tutguçlar bilen tutmaga synanyşarlar. Ilkinji gezek bu basgançakda ozal uçan Raptor hereketlendirijilerinden biri ulanylýar. Ol bäşinji synag uçuşynda, diň ilkinji gezek basgançagy tutmak üçin ulanylanda işledildi.
