Apple-iň baş direktory Tim Kuk ABŞ-nyň saýlanan prezidenti Donald Trampyň kasam kabul ediş dabarasyna 1 million dollar peşgeş berer. Bu barada Axios neşiri habar berdi.
"Alabamanyň buýsançly ýaşaýjysy bolan Kuk kasam kabul ediş dabarasyny Amerikanyň ajaýyp däbi hasaplaýar we oňa agzybirlik ruhunda peşgeş berýär" - diýip, neşiriň söhbetdeşleri mälim etdiler. Apple-den haýyr-sahawata garaşylmaýandygyny aýdyp, sözleriniň üstüni ýetirdiler.
Ondan öň Meta, Amazon kompaniýalary, şeýle hem OpenAI-yň esaslandyryjysy we başlygy Sem Altman hem-de beýleki iri telekeçiler, şol sanda diňe bir tehnologiýa kompaniýalary däl, eýsem awtoulag öndürijileri hem Trampyň kasam kabul ediş dabarasynyň gaznasyna haýyr-sahawat berýändiklerini yglan etdiler.
Tim Kuk Tramp bilen gatnaşygy ýola goýmak üçin, onuň birinji prezidentlik eden döwründe ýygy-ýygydan duşuşýardy diýip, The Wall Street Journal gazeti habar berýär. Axios-yň berýän maglumatlaryna görä, 2024-nji ýylyň dekabrynda Kuk syýasatçynyň Floridadaky Mar-a-Lago rezidensiýasyna nahara çagyryldy.
Apple ABŞ-da we dünýäde iň iri salgyt töleýji bolup durýar diýip, Axios ýatladýar.
