2025-nji ýylyň 1-nji ýanwarynda Ýewropa ýurtlarynyň köpüsinde gyşky transfer penjiresi açyldy – futbol klublaryna täze oýunçylar bilen şertnama baglaşmak ýa-da kärendesine almak üçin bir aý wagt berilýär.
Ýylyň ilkinji güni transfer penjiresi Angliýada, Germaniýada, Fransiýada, Şotlandiýada, Gresiýada, Daniýada, Awstriýada, Kiprde we beýleki birnäçe ýurtda açyldy. Ispaniýada we Italiýada transfer amallary 2-nji ýanwarda geçirilip başlanýar.
Bu babatda birnäçe sport KHBS-inde alnyp barylýan gepleşikler we mümkin bolan transferler barada habarlar peýda bolýar.
- Mohamed Salah: Žurnalist Romen Kolle Godeniň maglumatlaryna görä, Fransiýanyň “Pari Sen-Žermen” kluby 32 ýaşly müsürli oýunça hepdede 500 müň ýewro zähmet haky bilen üçýyllyk şertnama hödürleýär. “Liwerpul” hem hepdede 400 müň ýewro bilen ikiýyllyk şertnama teklip edip, oýunçyny saklamaga çalyşýar. Salahyň häzirki şertnamasy tomsuna tamamlanýar.
- Jowani Kuenda: “Sportingiň” 17 ýaşly oýunçysyna Ýewropanyň birbada birnäçe öňdebaryjy kluby, şol sanda “PSŽ”, “Liwerpul”, “Mançester Siti” we “Mançester Ýunaýted” gyzyklanma bildirýär diýip, insaýder Rudi Galetti habar berýär.
- Duşan Wlahowiç: “Ýuwentusyň” 24 ýaşly serbiýaly hüjümçisi bilen şertnama baglaşmaga Londonyň “Arsenaly” gyzyklanma bildirýär diýip, Galetti habar berýär. Klub ony gyşky transfer penjiresinde ileri tutulýan maksat hökmünde kesgitledi.
- Wilýam Saliba: Madridiň “Realy” “Arsenalyň” 23 ýaşly fransiýaly goragçysyny 100 mln ýewro satyn almagy göz öňünde tutýar. Şeýle mukdar goragçy oýunçy üçin rekord bolup biler diýip, Sport.es habar berýär.
- “Mançester Ýunaýted” gyşky transfer penjiresinde çykarjak esasy oýunçylaryny kesgitledi. Klub braziliýaly ýarymgoragçy Kazemiro, daniýaly oýunçy Kristian Eriksen we şwesiýaly goragçy Wiktor Lindelýof bilen aýrylyşmagy meýilleşdirýär diýip, insaýder Fabrisio Romano habar berýär.
- Kriştianu Ronaldu 2025-nji ýylyň tomsunda şertnamanyň möhleti tamamlanandan soň “Al-Nasrdan” gitmek kararyna geldi. Maisfutebol-yň maglumatlaryna görä, portugaliýaly möhüm titullar üçin göreşýän toparda çykyş etmek isleýär.
