Budapeştiň merkezinde LEGO-nyň 1,8 million bölejiginden ýasalan özboluşly tramwaý peýda boldy. 11 metrlik gurluşy wenger suratkeşi Balaž Doçi ýygnady diýip, South China Morning Post habar berýär.
Doçiniň sözlerine görä, taslamanyň üstünde 6800 sagatlap işlenildi we 90 kömekçiniň tagallasy gerek boldy.
Tramwaý şäheriň iň uly “Budapeştiň ulag merkezi” gatnawlar edarasy (Budapesti Közlekedési Központ) tarapyndan sargyt edildi. Gurluş şäheriň köçelerinde hereket etmäge ukyply, ýöne ýolagçy gatnadyp bilmeýär. Onuň daş ýüzüne ötegçileriň LEGO-nyň böleklerini dakyp bilmegi üçin ýörite plitalar goýlan.
Şeýle taslamalaryň üstünde işlemek juda takyklygy talap edýär.
“Megakonstruksiýalarda millimetriň ondan biri ýaly möçberdäki säwligiň goýberilmegi hem ähli zady puja çykaryp biler” - diýip, Balaž Doçi düşündirýär.
48 ýaşly suratkeş LEGO bilen çagalygyndan bäri gyzyklanýar.
“Biz has uly gurluşlary gurmak üçin goňşy çagalara esbaplaryny getirmegini haýyş edip ýalbarýardyk. Eýýäm şol wagtlar güýçli islegimiz bardy " - diýip, suratkeş ýatlaýar.
2013-nji ýylda ol dogany bilen LEGO gurluşlaryny döredýän hem-de çagalar we ulular üçin çäreleri gurnaýan Brick Workshop kompaniýasyny döretdi. 2017-nji ýylda bolsa Balaž LEGO-nyň kepillendirilen hünärmeni hökmünde ykrar edildi.
