Halkara küşt federasiýasy (FIDE) Nýu-Ýorkda geçirilýän blitz boýunça dünýä çempionatynda dress-kod talaplarynyň gowşadylandygyny habar berdi. Bu barada federasiýanyň prezidenti Arkadiý Dworkowiç mälim etdi.
“Men egin-eşigiň ýerlikliligi bilen bagly çözgüt çykarylanda FIDE-niň resmi wekillerine çeýe bolmaga mümkinçilik berýän çemeleşmäni synap görmek kararyna geldim” – diýip, Dworkowiç aýtdy.
Indi gatnaşyjylara resmi dress-koddan sähel gyşarmalara, mysal üçin, penjegiň stiline laýyk gelýän jinsini geýmäge rugsat berilýär. Dworkowiç üýtgeşmeler hetdenaşa geçmäge sebäp bolmaz diýip ynam bildirdi.
“Galyberse-de, Täze ýyl gelýär we men hiç kim goşmaça çeýelikden hetdenaşa peýdalanyp, baýramçylyk şähdini bozmaga synanyşmaz diýip umyt edýärin” – diýlip, beýanda aýdylýar.
Bu çözgüt rapid boýunça dünýä çempionatynda Magnus Karlsen bilen bolan dawadan soň kabul edildi. Emin küştçä ýaryşa jinside gelendigi üçin 200 dollar jerime saldy we Karlseniň eşigini üýtgetmegini talap etdi, ýöne norwegiýaly muny etmekden boýun gaçyryp, çempionatdan çekildi. Şeýle-de, ol blitz boýunça ýaryşdan aýrylmak kararyna geldi, ýöne Dworkowiç we ýaryşyň esasy hemaýatkäri, gazagystanly milliarder Timur Turlow ony ynandyryp bildiler diýip, The Guardian ýazýar.
“Dworkowiç we esasy hemaýatkär Turlow bilen gürleşip, men netijeli pikir alşyp biljekdigimizi duýdum we netijede oýnamak kararyna geldim. Mundan başga-da, men blitz-küşti oýnamagy gowy görýärin. Men janköýerlere nähili oýnaýandygymy görmäge mümkinçilik beresim gelýär. Ähtimal, bu iň soňky gezek bolar, kim bilýär” – diýip, Karlsen aýtdy.
Blitz boýunça dünýä çempionaty 30-njy dekabrda başlady. Rapid boýunça ýaryşyň ýeňijisi erkekleriň arasynda 18 ýaşly russiýaly küştçi Wolodar Murzin, zenanlaryň arasynda hindistanly küştçi Hampi Koneru boldy.
