Telegram messenjeri 2024-nji ýylda 1 milliard dollardan gowrak girdeji gazanyp, taryhynda ilkinji gezek girdeji aldy. Üstünlik abonentleriň sanynyň we mahabat girdejileriniň köpelmegi bilen bagly. Kompaniýanyň möhüm maliýe üstünliklerini messenjeriň esaslandyryjysy Pawel Durow mälim etdi.
Durowyň sözlerine görä, bu hyzmatyň tölegli abonentleriň sany 12 million adama ýetdi.
“Çak edişim ýaly, 2024-nji ýyl Telegram üçin üstünlikli ýyl boldy. Messenjer üç ýyllyk monetizasiýanyň taryhynda ilkinji gezek girdeji gazandy. Bu ýyl Telegram Premium-yň abonentleriniň sany üç esse artyp, 12 million adamdan geçdi. Mahabat girdejilerimiz hem birnäçe esse artdy. Netijede, hyzmatyň 2024-nji ýyldaky umumy girdejisi 1 milliard dollardan geçdi we kripto aktiwlerini hasaba almazdan, ýyly 500 million dollardan gowrak nagt ätiýaçlyklary bilen tamamlaýarys. Biz sosial ulgamlaryň garaşsyz bolmak we ulanyjylaryň hukuklaryna hormat goýmak bilen maliýe durnuklylygyny gazanyp biljekdigini görkezip bildik "- diýip, messenjeriň ýolbaşçysy habar berdi.
