Google ýerli gurluşlardan ýüklenen resminamalardaky maglumaty gözlemäge mümkinçilik berýän täze funksiýany synap başlady diýip, “Haýtek” habar berýär.
Gözleg setirinde skrepka görnüşinde düwme peýda boldy we onuň kömegi bilen ýerli gurluşdan faýly ýükläp bolýar. Ýüklemeden soň ulgam göni gözleg setirinde faýlyň mazmuny barada islendik soragy bermegi teklip edýär.
Synag funksiýasy faýlyň tekstini seljerýär we degişli soraglara jogap berýär.
Resminamany ýüklemek üçin skrepka ses gözlegi we “Obýektiw” düwmeleriniň gapdalynda ýerleşendir. Bu funksiýa ChatGPT we Google Gemini (Gemini Advanced ýazylyşygy bilen) ýaly käbir hyzmatlarda eýýäm bar. Ýöne onuň mugt Google gözleg ulgamyna girizilmegi has giň auditoriýany özüne çekip biler.
Şeýle-de bolsa, funksiýa maglumatlaryň howpsuzlygy babatda alada döredýär. Google ýüklenen faýllaryň nähili goraljakdygyny anyklaşdyrmady we bu gizlin maglumatly ulanyjylar üçin töwekgelçilikli bolup biler.
Häzirki wagtda täze funksiýa synag tapgyrynda bolup, onuň köpçülikleýin elýeterli boljakdygy we ykjam Google programmalarynda peýda boljakdygy ýa-da ýokdugy belli däl.
