Ýaponiýanyň Honda we Nissan kompaniýalary birleşmek baradaky gepleşiklere başladylar. Bu olary ululygy boýunça dünýäde üçünji uly awtoulag öndürijisine öwrer.
23-nji dekabrda Nissan-yň web sahypasynda "ara alyp maslahatlaşmaga başlamak we bilelikdäki Holding kompaniýasyny döretmek arkaly iki kompaniýanyň işini birleşdirmek mümkinçiligini öwrenmek üçin özara düşünişmek hakynda Ähtnama" gol çekilendigi habar berildi. Şeýle hem, Honda we Nissan bu topara goşulmagy göz öňünde tutmak üçin ýene bir ýapon öndürijisi - Mitsubishi Motors bilen aýratyn Ähtnama gol çekişdiler. Nissan Mitsubishi-niň esasy paýdarydyr.
Honda-nyň ýolbaşçysy Tosihiro Mibeniň sözlerine görä, birleşmek täze bäsdeşlere garşy durmak üçin zerurdyr.
“Hytaý awtoulag öndürijileriniň we täze bäsdeşleriň peýda bolmagy awtoulag pudagyny düýpgöter üýtgetdi. 2030-njy ýyla çenli olara garşy göreşmek üçin mümkinçiliklerimizi ösdürmeli, ýogsam ýeňleris "-diýip, Reuters agentligi Mibeniň sözlerini getirýär.
Birleşilen ýagdaýynda, bilelikdäki kompaniýanyň satuwy 30 trillion ýena (191 milliard dollar) ýeter, girdejisi bolsa 3 trillion ýenadan (19 milliard dollar) geçer.
Mitsubishi 2025-nji ýylyň ýanwar aýynyň ahyryna çenli täze topara goşulyp-goşulmazlyk barada belli karara gelmeli.
Birleşmek baradaky gepleşikleri 2025-nji ýylyň iýun aýynda tamamlamak, holdingi 2026-njy ýylyň awgustynda döretmek meýilleşdirilýär. Birleşdirilen kompaniýanyň direktorlar geňeşindäki orunlaryň köpüsini Honda-nyň wekilleri eýelär diýlip garaşylýar.
Netijede, kompaniýalar Hyundai-ýy we Kia-ny yzda galdyryp, Toyota-dan we Volkswagen-den soň dünýäde üçünji orny eýelär.
Gepleşikleriň başlandygy baradaky habarlaryň esasynda ABŞ-nyň söwda bazarynda Honda-nyň paýnamalary takmynan 16% ýokarlandy.
