Sony Honda Mobility 2025-nji ýylda deslapky sargydy edip boljak ilkinji elektrik ulagy bolan Afelia-nyň multimediýa mümkinçiliklerini görkezdi. Awtoulag ýolagçylara Stingray-iň 100 müňden gowrak aýdym-sazly kitaphanasy gurlan karaoke hyzmatyny hödürlär diýip, ITHome habar berýär.
Bu hyzmat Sony Group-yň Kanadanyň Stingray Group-y bilen hyzmatdaşlygynyň netijesi bolar.
Sony Honda Mobility-niň başlygy we baş ýerine ýetiriji direktory Ýasuhide Mizuno: “Ulagy sürüp barýarkaňyz ýolagçylaryňyz bilen birlikde halaýan aýdymlaryňyzy aýdyp bilersiňiz. Bu syýahatyňyzdan galjak täsirleri has-da ýatda galyjy eder” – diýip belleýär.
Şeýle hem kompaniýa ABŞ-nyň bazarynda satylýan ulaglar üçin elýeterli boljak Sony Pictures Entertainment-iň RIDEVU film akym hyzmatyny hödürledi.
Afelia Honda bilen Sony-niň bilelikdäki kärhanasynyň ilkinji awtoulagy bolar. Bu brend 2022-nji ýylda döredilipdi. Geljekde kompaniýa 2027-nji ýylda krossower we 2028-nji ýylda ykjam sedan çykarmagy meýilleşdirýär.
Elektromobil öňdäki bamperde batareýanyň zarýadyny we beýleki maglumatlary görkezmäge ukyply özboluşly multimediýa paneli bilen üpjün ediler. Mundan başga-da, awtoulag şäher şertleri üçin döredilen L2 sürüjä kömek ulgamyny goldar.
