Çarşenbe güni Ýaponiýanyň awtoulag öndürijisi Nissan Motor Co.-nyň paýnamalary 24% gymmatlady, bu soňky 50 ýylyň içinde onuň iň uly ösüşi boldy. Bu onuň Honda Motor Co. bilen birleşmeginiň ähtimallygy baradaky habarlaryň çäginde bolup geçdi. Munuň Nissan-a maliýe çökgünliginden çykmaga we hatarda galmaga kömek etjekdigine maýadarlar umyt baglaýarlar diýip, Bloomberg ýazýar.
Nissan-yň paýnamalary Nikkei 225 indeksiniň öňdelikçisi boldy. Çünki maýadarlar has güýçli hyzmatdaşyň geljekde berjek goldawy baradaky habary oňlamak bilen kabul etdiler. Häzirki dolandyryşyň ýolbaşçylygynda Nissan-yň paýnamalary soňky 50 ýylda iň erbet görkezijini görkezipdi.
Londonda ýerleşýän Pelham Smithers Associates Ltd. barlag şereketiniň uly seljerijisi Juli But: "Nissan-yň maliýe we amaly taýdan has güýçli hyzmatdaş tarapyndan goldanjakdygyny göz öňünde tutup, muny gowy habar diýip hasaplamalydyr" – diýip belleýär.
Çarşenbe güni, awtoulag öndürijileriniň arasynda geçirilen gepleşiklerden soň, Honda-nyň wise-prezidenti Sinji Aoýama kompaniýanyň birleşmek, maýa hyzmatdaşlygy ýa-da holding kompaniýasyny döretmek ýaly, hyzmatdaşlygyň birnäçe wariantlaryna garap görýändigini aýtdy.
Şeýle-de, Mitsubishi Motors Corp.-iň hyzmatdaşlyga gatnaşyp biljek paýnamalary hem 20 göterim ýokarlandy, bu onuň 2013-nji ýyldan bäri iň uly ösüşidir. Şol bir wagtyň özünde, Nissan-y “halas etmeli” bolar diýen howatyrlanmasy sebäpli Honda-nyň paýnamalary 3,4% pese gaçdy. Bloomberg Intelligence guramasynyň uly seljerijisi Tasuho Ýosida şeýle hyzmatdaşlygyň Honda üçin getirjek peýdasynyň gysga möhletli bolmajakdygyna ynanýar.
