Kakao noýbalarynyň bahasy taryhda ilkinji gezek bir tonna üçin 12 müň dollardan geçdi. 18-nji dekabrda Nýu-Ýorkuň söwda biržasynda (NYMEX) geçirilen söwdada mart fýuçersleri 3,9% ýokarlanyp, bir tonna üçin 12 224 dollara ýetdi, soňra 12 100 dollara çenli pese düşdi.
Rekord ösüş gurakçylyk we yssy howa sebäpli Kot-d’Iwuarda önümçiligiň peselmeginden howatyrlanmak bilen baglanyşyklydyr. Kot-d’Iwuar iň uly kakao öndürijisi bolup, global möçberiň üçden bir böleginden köpüsini üpjün edýär. Bloomberg analitikleriniň hasaplamalary boýunça, 2024-2025 möwsümi ýurda, takmynan, 1,9 mln tonna getirer we bu resmi çaklamadan 10% azdyr.
Şu ýyl kakao üçin fýuçersler Günbatar Afrikada hasylyň pes bolmagy sebäpli tas üç esse gymmatlady, bu hem tutuş taryhyň dowamynda bazarda iň uly ýetmezçilige getirip, eksportçylary ätiýaçlyklary satmaga mejbur etdi.
Dekabr aýynyň başynda Reuters şu möwsümde portlara kakao noýbalarynyň iberilişiniň 2023-2024 möwsüminiň degişli döwri bilen deňeşdirilende 34% ýokarlanandygyny habar berdi. Şeýle-de bolsa, bazar üçin geçen möwsüm soňky onýyllykda iň ýaramazy boldy. Eger üpjünçilik möçberini adaty 2022-nji ýyl möwsümi bilen deňeşdirseň, ol 15% pesdir diýip, agentligiň çeşmesi belleýär.
Niderlandlaryň ING bankynyň strategleri 2025-nji ýylyň dowamynda kakao bahalary durnuksyz bolar diýip hasaplaýar.
