NASA Crew-9 kapsulasynda astronawtlaryň yzyna gaýdyp gelmegini ýene yza süýşürdi. Indi ekipažyň 2025-nji ýylyň mart ýa-da aprel aýynyň ahyrynda gaýdyp gelmegi meýilleşdirilýär. Öň, olar fewralda yzyna gaýtarylmalydy.
Ýatlap geçsek, iýun aýynda NASA-nyň astronawtlary Butç Uilmor we Sunita Uilýams Boeing kompaniýasynyň ilkinji dolandyrylýan Starliner gämisinde HKS-e ugradylar. Ilkibaşda olar ol ýerde 10 gün töweregi bolar diýlip çaklanyldy, ýöne gämi bilen bagly näsazlyklar olary stansiýada has uzak galmaga mejbur etdi.
Şonda NASA Ilon Maskyň SpaceX kompaniýasyna ýüz tutdy we kompaniýa 28-nji sentýabrda SpaceX Crew-9 missiýasy bilen Crew Dragon C212 (Freedom) kosmos gämisini uçurdy. 30-njy sentýabrda gämi HKS-iň amerikan segmentiniň “Sazlaşyk” moduly bilen birleşdi. Ekipažly kapsulanyň yzyna gaýdyp gelmegini fewral aýynda amala aşyrmak meýilleşdirilipdi, ýöne indi senäniň mart aýynyň ahyryna geçirilendigi belli boldy. Uilmor bilen Uilýoms HKS-de ýene bir aý uzak garaşmaly bolar. Olardan başga-da Crew Dragon Ýere astronawt Nik Heýgi we kosmonawt Aleksandr Gorbunowy getirer.
NASA-nyň täjirçilik ekipažlary programmasynyň menejeri Stiw Stiç möhletiň süýşürilmegini stansiýa çalyşýan ekipažy eltjek indiki Crew-10 missiýasynyň taýýarlygynda öňden görülmedik gijikdirmeler bilen düşündirdi. Esasy kynçylyk SpaceX kompaniýasynyň täze Dragon gämisini işläp taýýarlamakda we synagdan geçirmekde jemlenýär.
Müňlerçe bölekleri we ulgamlaryň ençeme gezek barlanmagyny öz içine alýan häzirkizaman kosmos gämilerini ýygnamak kynçylygy köp wagt we ownuk zatlara üns berilmegini talap edýär, bu hem uçuş meýilnamasynyň üýtgedilmegine getirdi. Indi NASA Crew-10-y uçurmak üçin gutarnykly möhlet bolmasa-da, 2025-nji ýylyň martyny ýa-da aprelini göz öňünde tutýar.
