Team Asobi studiýasynyň Astro Bot platformeri “Ýylyň oýny” hökmünde The Game Awards 2024-üň baş baýragyny aldy. Sony-nyň taslamasy Balatro, Black Myth: Wukong, Elden Ring: Shadow of the Erdtree, Final Fantasy VII Rebirth we Metaphor: ReFantazio ýaly bäsdeşlerden öňe geçdi.
The Game Awards baýragynyň 11-nji gowşurylyş dabarasy Los-Anjelesde geçirildi we guramaçylar kompýuter oýunlary pudagynda gazanylan üstünlikleri bellediler.
Astro Bot “Iň gowy oýun režissýorlygy”, “Iň gowy maşgala oýny” we “Iň gowy başdangeçirmeli ekşn oýny” nominasiýalarynda hem ýeňiş gazandy.
Metaphor: ReFantazio we Balatro oýunlarynyň hersi üç baýrak aldy.
Sylaglamakdan başga-da, guramaçylar “The Witcher 4” we It Takes Two-nyň awtorlarynyň indiki oýny ýaly birnäçe täze taslamany-da hödürlediler.
“Iň gowy kibersport oýny” nominasiýasynda ýeňiji Riot Games-den League of Legends boldy, ol TGA-da eýýäm dördünji ýeňşini gazandy. Oýun Dota 2, Counter-Strike 2, Valorant we Mobile Legends: Bang Bang oýunlaryndan öňe geçdi.
2024-nji ýylyň iň gowy kiber türgeni LoL boýunça bäş gezek dünýä çempiony Li Faker San Hýok, iň gowy topar bolsa onuň T1 rosteri boldy.
