Türkmenistanyň Bilim ministrligi tarapyndan yglan edilen ýaşlaryň arasynda robot tehnologiýasy boýunça geçirilen bäsleşige ýurdumyz boýunça ýaşlaryň 272-si gatnaşyp, olaryň 181-si mekdep okuwçylaryndan, 91-si orta hünär we ýokary okuw mekdepleriniň talyplaryndan ybarat. Bu barada "Türkmenistan" gazetinde habar berilýär.
Bäsleşik Ýagşygeldi Kakaýew adyndaky Halkara nebit we gaz uniwersitetinde Innowasiýa ylmy-okuw merkeziniň guramagynda geçirildi. Bäsleşigiň çäklerinde ýurdumyzyň umumybilim berýän orta mekdepleriniň, bilim merkezleriniň hem-de robot tehnologiýasy we emeli aň tehnologiýasynyň üsti bilen bilim bermegiň aýratynlyklaryny, ösüş ugurlaryny açyp görkezýän sergi hem guraldy. Sergide birnäçe ugurdaş ýokary okuw mekdepleriniň, «Imdat elektronika», «Gyrat», «Milli ulgam», «Dana», «Päk nesil» ýaly bilim merkezleriniň bu ugurdaky mümkinçilikleri we taslamalary, şeýle hem Türkmenistanyň Goranmak ministrliginiň Berdimuhamet Annaýew adyndaky Ýöriteleşdirilen harby mekdebiniň okuwçylarynyň taýýarlan robotlary tanyşdyryldy.
Degişli meýilnama laýyklykda, ýaryşlar «Sumo robotlaryň bäsleşigi», «Labirint bäsleşigi», «Topar taslamalarynyň bäsleşigi» hem-de «Ak ýerde gara çyzyklar boýunça hereket edýän robotlaryň bäsleşigi» diýen ugurlar boýunça geçirildi.
Iki günläp dowam eden bäsleşigiň açylyş dabarasyna «PETRONAS Çarigali (Türkmenistan) Sdn Bhd» kompaniýasynyň Baş ýerine ýetiriji direktory Ismadi bin Ismail hormatly myhman hökmünde gatnaşdy. Ol kompaniýanyň «Anymal X» roboty bilen tanyşdyrdy.
Bäsleşigiň jemleri boýunça iň tapawutlanan gatnaşyjylaryň 18-si ýeňiji diýlip yglan edildi. Netijede, ýekeleýin ugurlar boýunça Türkmenistanyň Oguz han adyndaky Inžener-tehnologiýalar uniwersitetiniň talyby Ýusup Baýramdurdyýew, Türkmenistanyň Inžener-tehniki we ulag kommunikasiýalary institutynyň talyby Orazsähet Atamyradow, Aşgabat şäherindäki 96-njy orta mekdebiň okuwçysy Maksat Kakaýew birinji orny eýelediler. Toparlaýyn taslamalaryň bäsleşigi boýunça Halkara ynsanperwer ylymlary we ösüş uniwersitetiniň talyplary Pirguly Öwezow, Maksat Kakajanow hem-de Oguzhan Annageldiýew birinji orna mynasyp boldular. Ýeňijilere Hormat hatlary we sowgatlar dabaraly ýagdaýda gowşuryldy.
