Kaliforniýanyň San-Fernando jülgesindäki taşlanan ammarda Maýkl Jeksonyň öň çykarylmadyk aýdymlaryny saklaýan 16 kasseta tapyldy. Ýöne olar diňleýjiler üçin elýeterli bolman, has dogrusy, kolleksionerler tarapyndan ýygnalsa gerek diýip, The Hollywood Reporter habar berýär.
Ýazgylary Kaliforniýanyň ýol patrulynyň öňki işgäri Gregg Masgrouw tapdy. Ozal ammar aýdym-saz prodýuseri we aýdymçy Braýan Lorene degişlidi.
Kassetalarda 15 sany aýdym bolup, olardan 12-si doly tamamlanan. Jekson olaryň üstünde 1989-njy ýyldan 1991-nji ýyl aralygynda, “Dangerous” albomy çykmazdan ozal işläpdir.
Aýdymlardan başga-da, kassetalarda Jekson bilen Loreniň studiýa işi we kompozisiýalar barada gürrüňdeşliginiň ýazgysy bar. Aýdymlaryň arasynda “Don’t Believe it”, “Seven Digits”, “Son of Thriller”, “All The Truth You Need”, “Man In Black”, “Canʼt Come Back” we “Truth on Youth” atly kompozisiýalar bar. Soňky aýdymynda Jekson repçi LL Cool J (sazanda Jekson bilen hyzmatdaşlyk barada aýdypdy) bilen bilelikde rep okaýar.
Masgrouw Maýkl Jeksonyň mirasdüşerlerine ýüz tutdy, ýöne olar ýazgylary öwrenip, näbelli bir sebäbe görä olary satyn almakdan ýüz öwürdiler. Resmi hatda mirasdüşerler kassetalara dalaş etmeýändiklerini ýazdylar, ýöne olara eýe çykan islendik biriniň bu aýdymlar üçin awtorlyk hukugyny alyp bilmejekdigini bellediler. Bu bolsa aýdymlaryň resmi taýdan ýaýradylman biljekdigini aňladýar.
Masgrouw auksion öýleriniň üsti bilen ýazgylary kolleksionerlere satmagy meýilleşdirýär.
Ömrüniň dowamynda Maýkl Jekson on studiýa albomyny çykardy we olar 500 milliondan gowrak nusga tiraž bilen satyldy. Sazanda 2009-njy ýylyň iýun aýynda 50 ýaşynda, hoşlaşyk konsert syýahaty yglan edilenden gysga wagtdan soň aradan çykdy. Ol ölenden soň ozal çykmadyk aýdymlar bilen ýene iki albomy çykdy.
