Ýaponiýada 2024-nji ýylyň nyşany hökmünde “kin” (“altyn”) ieroglifi saýlandy. Bu barada Kiotadaky “Kiýomidzu-dera” (“Arassa suw ybadathanasy”) buddizm ybadathanasynda geçirilen dabarada yglan edildi diýip, TASS habar berýär.
Çözgüt 221 müňden gowrak adamyň gatnaşmagynda umumymilli ses berişligiň esasynda kabul edildi. “Altyn” üçin gatnaşyjylaryň 5,47%-i ses berdi.
Şeýle saýlawyň esasy sebäpleri Ýaponiýanyň Pariždäki Olimpiadada gazanan sport üstünlikleri, Sado adasyndaky altyn we kümüş känleriniň ÝUNESKO-nyň obýektleriniň sanawyna girizilmegi, şeýle-de Liberal-demokratik partiýasynda maliýe hasabatynyň bozulmagy bilen baglanyşykly syýasy dawa boldy.
Däp bolşy ýaly, ýylyň nyşany ybadathananyň ruhanysy Seýhan Mori tarapyndan şaly sypalyndan edilen uly ýuka kagyza çekildi. Şeýle dabara 1995-nji ýyldan bäri geçirilýär we häzirki hasap boýunça 30-njy boldy.
Geçen 2023-nji ýylyň nyşany “salgyt” ieroglifi bolupdy, 2021-nji ýylda bolsa nyşan hökmünde ýaponiýaly türgenleriň Tokiodaky tomusky Olimpiadada rekord mukdarda altyn medala mynasyp bolmagy sebäpli “altyn” saýlandy.
Nyşanyň saýlanmagy geçip barýan ýylyň iň möhüm wakalaryny we ýapon jemgyýetiniň şähdini görkezýär.
