22 ýaşly amerikaly basketbolçy Keýtlin Klark Time žurnaly tarapyndan ýylyň zenan türgeni saýlandy.
Zenanlaryň Milli basketbol assosiasiýasynyň (WNBA) “Indiana Fiwer” klubunyň goragçysy Klark 2024-nji ýylyň draftynda (liga goşulmak isleýän täze basketbolçylary saýlamak) birinji belgi bilen saýlandy. Geçen möwsümde ol 40 oýna gatnaşyp, ortaça 19,2 utuk gazandy. Ol möwsümde topy geçirmegiň sany boýunça WNBA-nyň rekordyny goýdy (337) we liganyň taryhynda 769 utuk gazanan hem 122 gezek üç utukly zyňyş eden ilkinji täze oýunçy boldy. Mundan başga-da, Klark bir oýundaky geçirimleriň sany boýunça WNBA-nyň rekordyny goýdy – 19.
Onuň tagallalary bilen “Indiana” 2016-njy ýyldan bäri ilkinji gezek pleý-offa çykdy. Toparyň oýunlary geçen möwsümde iň köp tomaşa edilýän oýunlar boldy. Şeýle-de, topar öý oýunlaryna gatnaşyk boýunça WNBA-nyň rekordyny täzeledi. Yzygiderli möwsümiň “Waşington Misiks” bilen “Indiananyň” arasyndaky soňky oýny WNBA-nyň bir oýnuna gatnaşanlaryň sany boýunça täze rekord goýdy – 20 711 adam.
