Meksikanyň Idalgo sebitinde gurluşykçylar täze gara ýoly çekip ýörkäler 1375 ýaşly piramidanyň üstünden bardylar. Tapyndy asteklere garaşsyzdygy bilen tanalýan, Ispaniýadan öňki Mestitlan şalygyna degişlidir. Açyş barada Interesting Engineering neşiri gürrüň berýär.
Milli antropologiýa we taryh institutynyň (INAH) berýän maglumatyna görä, Structure 1 diýlip atlandyrylan piramida bäş bölümi we 10 depäni öz içine alýan arheologiki toplumyň bir bölegidi.
San-Agustin-Meskititlanyň syýahatçylyk ministri Ektor Labra Çawes: "Tapyndy adam zähmetiniň 14 000 ýylyň dowamyndaky yzlaryny yzarlap boljak, sebitiň Ispaniýadan öňki baý geçmişini tassyklaýar" – diýip belledi.
Arheologlar bu sebiti öwrenmek üçin uçarmansyz uçarlary we öňdebaryjy derňew usullaryny ulandylar. Piramida bilen birlikde olar Meskanyň medeniýeti barada täze bilim berýän keramiki we organiki materiallary öz içine alýan başga-da ýüzlerçe artefaktlary tapmagy başardylar. Olar ýerli halklar üçin sebitiň nähili medeni ähmiýetiniň bolandygyny tassyklaýarlar.
Çeşmeleriniň çäklidigi sebäpli piramidanyň ýok bolup gitmeginiň öňüni almak üçin, goragy berkidildi. Ondan öň desgany berkitmek üçin gorag diwary (uzynlygy 43 m we beýikligi 11,7 m) gurlupdyr. Berkidilmezden ozal binýadynyň elementleri geotekstil (gorag üçin ulanylýan sintetiki süýümlerden ýasalan ýörite çydamly material) bilen örtüldi. Indi piramida fiziki taýdan elýeterlilik çäklidir, ýöne toplanan maglumatlar we materiallar mundan beýläkki barlaglar üçin esas bolar.
Geljekde taryhy ýadygärligi has jikme-jik öwrenmek üçin tagalla edilip bilner.
