Google kompaniýasy Willow (iňlis dilinden terjime edilende – “söwüt”) kwant prosessoryny hödürledi. Çip öndürijiligi boýunça hem döwrebap superkompýuterlerden, hem beýleki kwant prosessorlaryndan ep-esli güýçlüdir diýip, Google Quantum AI barlaghanasynyň esaslandyryjysy we ýolbaşçysy Hartmut Newen nygtaýar.
Prosessor 105 kubit bilen üpjün edilen. Google-yň maglumatlaryna görä, Willow standart hasaplaýyş-bençmarkyndan bäş minutdan az wagtyň içinde baş çykaryp bildi. Häzirki wagtda dünýäde iň tiz superkompýuterleriň biri hasaplanýan Frontier-e şol bir meseläni çözmek üçin 10 septillion ýyl (bu sanda ýigrimi dört nol bar) gerek bolardy.
Willow ýalňyşlyklaryň ýygylygyny azaltmaga we öndürijiligi ýokarlandyrmaga mümkinçilik berýän has köp kubiti ulanmak başarnygy bilen tapawutlanýar. Şeýle-de, ol kwant kompýuterleri üçin iň kyn test bolan RCS (Random Circuit Sampling) bençmarkynda-da üstün geldi.
RCS kwant kompýuterleriniň öndürijiligine baha bermek üçin ulanylýan çylşyrymly testdir. Willow bu barlag görkezijisinden hem geçip, beýleki kwant ulgamlary üçin çylşyrymly bolan kyn kwant hasaplamalaryndan baş çykarmak ukybyny görkezdi.
Üstünliklere garamazdan, Willow üçin täjirçilik gymmaty bolan meseleler heniz elýeterli däl. Işläp düzüjilere heniz ilkinji amaly hasaplamany ýerine ýetirmek gerek.
Google Quantum AI-iň ýolbaşçysy kwant hasaplamalarynyň we emeli aňyň bilelikdäki ösüşiniň dürli ugurlarda mundan beýläkki ylmy gözlegler üçin täze mümkinçilikleri açjakdygyna ynanýar. Mysal üçin, alymlar täze derman serişdelerini işläp taýýarlap, elektrik awtomobiller üçin has netijeli batareýalary taslap bilerler. Mundan başga-da, kwant hasaplamalary termoýadro sintezi pudagynda we umumy alternatiw energetikada öňegidişligi tizleşdirmäge kömek eder.
