Bristol uniwersitetiniň we Beýik Britaniýanyň Atom energiýasy boýunça edarasynyň (UKAEA) alymlary uglerod-14-üň esasynda dünýäde ilkinji almaz batareýasyny döretdiler. Bu innowasion energiýa çeşmesi radioaktiw bölünmäniň esasynda işleýär, onuň hyzmat ediş möhleti bolsa müňlerçe ýyla barabar diýip, Tech Xplore ýazýar.
“Biziň mikroenergetika tehnologiýamyz kosmos tehnologiýalaryndan we howpsuzlyk enjamlaryndan başlap, lukmançylyk implantatlaryna çenli birnäçe möhüm programmany goldap biler” – diýip, professor Tom Skott belledi.
Batareýa howpsuz we durnukly. Ol ýagtylygy elektrik energiýasyna öwürýän Gün panelleri ýaly işleýär, ýöne fotonlaryň deregine çalt hereket edýän elektronlary tutýar. “Almaz batareýalary mikrowattda kuwwatlylygyň hemişelik derejesini üpjün etmegiň ygtybarly we durnukly usulyny hödürleýär” – diýip, UKAEA-nyň wekili Sara Klark belläp geçdi.
Gurluş lukmançylykda, mysal üçin, göz implantatlary, eşidiş enjamlary we kardiostimulýator üçin ulanylyp bilner, bu hem olary çalyşmak zerurlygyny azaldar. Şeýle-de, batareýalar adatdan daşary şertlerde, mysal üçin, kosmos enjamlaryna gözegçilik etmek üçin kosmosda ulanylyp bilner.
Taslamanyň üstündäki işler UKAEA-nyň Kalhemdäki kampusynda alnyp baryldy we bu ýerde emeli almazlary ösdürip ýetişdirmek üçin termoýadro sintezi tehnologiýasy ulanyldy.
