Soňky bäş ýylda ykjam internetden peýdalanýan ulanyjylaryň sany 1,5 milliard artdy. Şeýle-de bolsa, trafigiň tizligi we göwrümi sebitleriň arasynda ep-esli üýtgeýär.
Bütindünýä bankynyň maglumatyna görä, iň çalt ykjam interneti bolan ýurtlaryň sanawynda öňdäki orunlary Ýakyn Gündogar we Aziýa ýurtlary eýeleýär.
Sanawyň başyny ortaça 179,6 Mbit / s tizlik bilen Birleşen Arap Emirlikleri çekýär. Goňşy Katar döwleti 160,3 Mbit / s tizlik bilen ikinji, Günorta Koreýa 138,5 Mbit / s tizlik bilen üçünji orny eýeleýär.
Bilermenler bu ýurtlaryň üstünliklerini sanly infrastrukturanyň işjeň ösendigi we 5G torlarynyň giňden ornaşdyrylandygy bilen baglanyşdyrýarlar. Şol bir wagtyň özünde, BAE eýýäm bar bolan telekommunikasiýa ulgamlarynyň 6G standartyna geçmek mümkinçiligini has-da ýokarlandyrmak üçin zerur çäreleri görýär.
Telekommunikasiýa we sanly ulgama gözegçilik edarasynyň (TDRA) baş müdiri Majed Al Mesmar: "Täze zolaklaryň (tizlikleriň) ulanylmagy hemişe öňdebaryjy bolup gelýän BAE-niň geljekde öňdebaryjy ornuny saklamak üçin zerur hil böküşini üpjün eder" – diýip belledi.
"6G standartynyň tehnologiýalary tehnologiki paradigma çalşygyny görkezýär, sebäbi olar ýyldyrym çaltlygyndaky terabit derejeli maglumat geçiriş tizligini, ýarym millisekunt jogap wagtyny üpjün edip, emeli aňyň kömegi bilen Internet-sýörfingiň hilini gowulandyrýar" - diýip TDRA-nyň başlygy sözüniň üstüni ýetirdi.
Ykjam internetde göçürip almagyň ortaça tizligi boýunça iň gowy 10 ýurt (Mbit / s):
- BAE - 179,6
- Katar – 160,3
- Günorta Koreýa – 138,5
- Norwegiýa – 131,2
- Daniýa – 123,7
- Kuweýt – 119,8
- Hytaý – 116,7
- Niderlandlar – 114,3
- Saud Arabystany – 101,9
- Bolgariýa - 97,6
