Türkmenistanyň wekiliýeti ABŞ-da «Ýokary okuw mekdeplerini dolandyrmak: hyzmatdaşlyk we täjirçilik» atly okuw maksatnamasyna gatnaşýarlar. Munuň üçin wekiliýet 2-20-nji dekabr aralygynda ABŞ-da iş saparynda bolýar diýip, "Türkmenistan: Altyn asyr" elektron neşiri habar berýär.
Okuw maksatnamasy Amerikanyň Birleşen Ştatlarynyň Döwlet departamentiniň International Visitor Leadership Program (IVLP) maksatnamasynyň çäklerinde geçirilýär.
Çärä Magtymguly adyndaky Türkmen döwlet uniwersitetiniň, Halkara ynsanperwer ylymlary we ösüş uniwersitetiniň, Türkmenistanyň Telekommunikasiýalar we informatika institutynyň hem-de Türkmenistanyň Milli bilim institutynyň wekilleri gatnaşýarlar.
Maksatnama Waşingtondaky halkara bilim institutynyň binasynda badalga berlip, şol ýerde çärä gatnaşyjylaryň ABŞ-nyň Döwlet departamentiniň hünärmeni Çikita Jekson, halkara bilim institutynyň maksatnamasynyň ýolbaşçysy Kris Hill we maksatnamanyň utgaşdyryjysy Siýerro De Palmo bilen duşuşygy geçirildi.
Duşuşygyň dowamynda diňleýjiler okuw maksatnamanyň mazmuny bilen giňişleýin tanyşdyryldy, gatnaşyjylaryň islegleri göz öňünde tutulyp, çäreleriň maksatnamasyna üýtgetmeleri girizmegiň mümkinçilikleri ara alnyp maslahatlaşyldy, şeýle hem olara has jikme-jik tanyşmak maksady bilen çykyş etmek üçin mümkinçilik döredildi. Türkmen wekiliýetiniň agzalary wekilçilik edýän edaralarynyň alyp barýan iş ugurlary hem-de geljek üçin öňde goýlan wezipeler barada amerikan tarapyna giňişleýin gürrüň berdiler.
Çäräniň dowamynda ABŞ-nyň döwlet gurluşyna çuňňur düşünmek üçin Amerikan uniwersitetiniň professory Diana Lowental federalizm temasy boýunça brifing geçirdi. Onda ABŞ-nyň döwlet dolandyryş ulgamy, hususan-da, federal hökümet (merkezi hökümet) bilen aýratynlykdaky ştatlaryň arasynda häkimiýetiň bölünilişi barada giňişleýin gürrüň berildi.
IVLP maksatnamasy ABŞ-nyň Döwlet departamentiniň hünärli işgärleri alyşmakdaky esasy maksatnamadyr. Birleşen Ştatlara gysga möhletli saparlaryň netijesinde daşary ýurtlaryň häzirki hem-de geljekde mümkinçiligi boljak liderleri dürli ugurlarda öz tejribeleri arkaly ýurt bilen tanyşýarlar we amerikaly kärdeşleri bilen uzak möhletleýin gatnaşyklary ösdürýärler. Duşuşyklar olara gatnaşyjylaryň hünär derejesindäki gyzyklanmalaryny beýan edýär hem-de Birleşen Ştatlaryň daşary syýasy maksatlaryny goldaýar.
