Germaniýanyň HOF Manufaktur kompaniýasy Mercedes-AMG G63-üň binýadynda döredilen Sir Class awtomobilini hödürledi. Awtoulag “Formula-1-iň” ýedi gezek çempiony we häzirki möwsümiň ahyrynda “Mersedesi” terk edýän britaniýaly Lýuis Hemiltona bagyşlandy.
HOF Sir Class kuwwaty 577 at güýjünden 1063 at güýjüne çenli artdyrylan dört litrlik V8 hereketlendirijisi bilen üpjün edildi. Döredijileriň aýtmagyna görä, ýolsuz ýerden ýöreýän awtomobil 3,5 sekuntda tizligini 100 km/sag çenli artdyrýar, onuň iň ýokary tizligi bolsa sagatda 300 km-den geçýär.
Mundan başga-da, HOF Sir Class-yň şassisi Mercedes-AMG G63-den 30 mm pesdir.
Awtomobil HOF-dan karbon-keramiki tormozlar we täze tigir arkalaryny, gapdal arkalary we yzky bölegiň komponentlerini öz içine alýan uglerod süýümli elementler toplumy bilen enjamlaşdyryldy.
Awtoulag mawy öwüşginli gara-kümüşsöw reňk bilen boýalyp, “Formula-1-de” “Mersedes” bolidleriniň adaty liwreýasyny gaýtalady.
Rul ýaryş bolidiniň rulunyň stilinde ýerine ýetirildi. Üçegiň içki ýüzüne “Ýas Marina” ýaryş ýolunyň konfigurasiýasynyň şekili çekildi. Hut şu ýerde, Abu-Dabiniň Gran-prisinde Hemilton nemes toparynyň düzüminde özüniň soňky ýaryşyny geçirdi. 2025-möwsüminden britaniýaly “Ferrari” toparyna goşular.
Sir Class awtoulagyndan jemi 11 nusga çykarylar. Onuň bahasy 690 müň dollara barabar.
