Hytaýyň BYD kompaniýasy çärýek satuwy boýunça taryhda ilkinji gezek Ford amerikan öndürijisinden öňe geçdi. 2024-nji ýylyň iýul aýyndan sentýabr aýy aralygynda BYD 1,13 mln awtomobil satdy we bu Ford bilen deňeşdirilende 40 müň awtomobil köpdür diýip, Nikkei Asia ýazýar.
Bu üstünlik BYD-y satuw möçberi boýunça dünýäde altynjy orna çykardy. Kompaniýa 2024-nji ýylyň ilkinji dokuz aýynda 3,25 mln awtomobil satdy we görkezijisi 3,3 mln awtomobil bolan Ford-dan birneme yza galdy.
BYD eýýäm 2023-nji ýyldaky rekordyny täzeledi, şol ýyl ol 3,024 mln awtomobil satypdy. Üçünji çärýekde kompaniýanyň satuwy geçen ýylyň degişli döwri bilen deňeşdirilende 38% ýokarlandy.
Hünärmenler, eger BYD häzirki ösüş depginini saklasa, onuň ýyllyk satuw möçberi boýunça hem Ford-dan öňe geçip biljekdigini belleýärler.
